قصر الذاكرة (memory palace)

اجي.. عمرك سمعتي ب "قَصْر الذاكرة" (memory palace)؟ method of loci؟ mind palace؟.. لا! غير شوف وكان!

تقدر تكون سمعتي بيه فشي فيلم أو مسلسل كايتبنا الأفكار الأساسية اللي كاتدور على شخصية فحال "شيرلوك هولمز".. sherlock, sherlock holmes (ديال بي بي سي)، المحقق كونان، the mentalist ؟... والو؟ 

واخا نعاماس؛ "قصر الذاكرة' هي واحد الطريقة (technique) باش نقويو الذاكرة ديالنا و الأفكار اللي كانسجلوهوم و بهاد الميطود كايبقاو لاصقين على المدى البعيد.. الفكرة هي أنك تشد بلاصة كيف ما كانت (بيت، قصر، دروج، الطريق من الدار لشي بلاصة، ماشي بالضرورة تكون حقيقية) غي هو تكون عارف هاديك البلاصة مزيان، التفاصيل فهاد الحالة غاينفعوك مزيان.. أييه، و من بعد ؟.. أتفرقو داكشي لي بغيتو تحفظو على شكل أفكار أساسية و ترسمو شي طريق فهاداك القصر اللي تخيلتوا (من البلاكة ديال الطوبيس للباب ديال داركوم مثلا).. و على طول هاداك الطريق غادي تحطو الأفكار ديالكم، هنا من المفضل تلعبو بالمخيلة ديالكوم و تربطو كل فكرة بقصة (باللغات اللي بغيتي، الشخصيات اللي بغيتي، و السيناريو اللي بغيتي)، هنا كلما كانت القصة أكثر غرابة كلما تزاد الاحتمال أنك تعقل عليها.. غاترجع مثلا فينما تدوز من حدا ديك الشجرة أتشوف اسحاق نيوتن جالس تحتها، والفوق كاين واحد القرد كايضربو بالتفاح، و تماك كايدور شي سيناريو كايشرح شي قانون من قوانين نيوتن.. (هادا غير مثال، غير عملو فبالكم أن الخيال ماعندوش حدود)..

ماشي بالضرورة يكون عندك قصر واحد ديال الذاكرة.. التكرار أعمى، كايخصكم تزوروا هاداك الطريق اللي رسمتو و تعاودو الأحداث ديال ديك القصة مرة مرة، تاتلصق فكرة بفكرة فهاداك الطانطو..

هادي من أول مميزات الشخصية ديال "شيرلوك".. هو أنه كايحط أي فكرة كاتجيه مهمة فقصر الذاكرة ديالو، و فينما كايدوخ أولى كايتلف كايجلس و يبدا يتسركل خطوة بخطوة.. تاكايلقا داكشي لي كايقلب عليه. 

فهاد الفيديو (مقتطف من سلسلة "شيرلوك" ديال بي بي سي) غادي تفهمو الفكرة أكثر، وكانصحكم تفرجو فيه: 

https://www.youtube.com/watch?v=0FSKTndbwVo 

واللي بغا مازال يقرا هلى هاد اللعيبة كاين كتوبا 

▪︎Mastermind: How to Think Like Sherlock Holmes 

▪︎Moonwalking with Einstein 

▪︎The Memory Palace - Learn Anything and Everything 

▪︎The Art of Memory